Neves yatorewe kuyobora Cabo Verde kuri manda ya kabiri

Bruno I. Bagambiki ·

Neves yatorewe kuyobora Cabo Verde kuri manda ya kabiri

Perezida José Maria Neves yegukanye manda ya kabiri ayitsinze mu cyiciro cya mbere, aho yabonye 63,8% by’amajwi mu gihe abo bari bahanganye barimo Joana Rosa bagize make.

Perezida wa Cabo Verde, José Maria Neves, yongeye gutorerwa kuyobora iki gihugu muri manda y’imyaka itanu, nyuma yo gutsinda amatora yabaye ku wa 15 Ugushyingo 2026, nk’uko imibare y’agateganyo ibigaragaza.

Ibarura ryari rimaze kugera ku biro by’itora 96.8% ku rwego rw’igihugu no mu mahanga, ryerekanye ko Neves yabonye amajwi 80,018, angana na 63.8%. Yari ashyigikiwe n’Ishyaka riharanira ubwigenge bwa Cabo Verde (PAICV).

Joana Rosa wahoze ari Minisitiri w’Ubutabera, akaba yari ashyigikiwe n’ishyaka ritavuga rumwe n’ubutegetsi rya MpD, yabaye uwa kabiri n’amajwi 39,660, angana na 31.6%. Ni we mugore wa mbere wiyamamarije kuyobora Cabo Verde kuva yabona ubwigenge mu 1975.

Abandi bakandida bane barimo Gilson Alves wagize 1.4%, Antero Tavares wagize 1.3%, Casimiro de Pina wagize 1.1% na Loisito Tavares Sousa wagize 0.9%.

Abatoye ntibageze no kuri kimwe cya kabiri

Aya matora yaranze n’umubare muto w’abayitabiriye, kuko abagera kuri 68% by’abari biyandikishije batatoye. Mu bantu 419.448 bari kuri lisiti y’itora, abagera kuri 275.011 ntibitabiriye amatora.

Nyuma yo kubona ibyavuye mu matora, Joana Rosa yemeye ko yatsinzwe, avuga ko yamaze no gushimira Neves. Yagaragaje ko kuba yarabaye umugore wa mbere wiyamamarije uyu mwanya ari intambwe mu guteza imbere uburinganire muri sosiyete ya Cabo Verde.

Neves w’imyaka 66, wabaye Perezida bwa mbere mu 2021, yari yabanje no kuba Minisitiri w’Intebe imyaka 15. Yavuze ko azakorera Abanya-Cabo Verde baba mu gihugu no mu mahanga, ashimangira ko azaharanira kuzamura imishahara no kurwanya ubukene.

Komisiyo y’Igihugu y’Amatora, CNE, ni yo itegerejweho gutangaza ibyavuye mu matora bya nyuma bimaze kugenzurwa.

Perezida José Maria Neves yongeye gutorerwa kuyobora Cabo Verde kuri manda ya kabiri.

IBANZE.com

Fungura JavaScript kugira ngo ukoreshe urubuga rwose.

Subira ahabanza