Perezida Kagame yakiriye indahiro za Gasamagera na Niyonshuti binjiye mu nteko
Perezida wa Repubulika, Paul Kagame, yakiriye indahiro za Senateri Amb. Wellars Gasamagera na Depite Ben Niyonshuti binjiye mu Nteko Ishinga Amategeko y’u Rwanda.
Uyu muhango wo kwakira izi ndahiro wabaye uyu munsi taliki ya 2 Ukwakira ku isaha ya Saa Kumi z’umugoroba mu Nteko Ishinga Amategeko y’u Rwanda.
Amb. Gasamagera yinjiye muri Sena ahagarariye Ihuriro ry’Igihugu Nyunguranabitekerezo ry’Imitwe ya Politiki, asimbura Senateri Donatille Mukabalisa witabye Imana muri Nyakanga 2026. Yatoranyijwe n’iri huriro ku wa 24 Nzeri 2026.
Naho Depite Ben Niyonshuti we yinjiye mu Mutwe w’Abadepite ahagarariye urubyiruko. Komisiyo y’Igihugu y’Amatora yatangaje ku wa 9 Nzeri 2026 ko ari we watsinze amatora yo gusimbura Venuste Icyitegetse wari weguye kuri uwo mwanya muri Kamena 2026. Niyonshuti yari yabonye amajwi 47 mu matora yabaye ku wa 2 Nzeri.
Mu butumwa yatanze nyuma y’indahiro, Perezida Kagame yibukije aba bayobozi ko inshingano zo mu Nteko Ishinga Amategeko zijyana no gukurikirana ibibazo bireba abaturage no kugira uruhare mu mikorere y’inzego z’igihugu.
Yagarutse ku mikoranire hagati y’Inteko Ishinga Amategeko na Guverinoma, agaragaza ko abayobozi bagomba kumenya ibibazo bihari, kubikurikirana no kugira uruhare mu gushaka ibisubizo, aho kubifata nk’inshingano zo kuzuza amategeko gusa. Itegeko Nshinga na ryo riteganya ko Inteko igenzura ibikorwa bya Guverinoma, ikanayisaba ibisobanuro ku mikorere yayo.
Umukuru w’Igihugu yabifurije kuzakora neza inshingano bahawe.
Perezida Kagame yasabye abayobozi bashya gufatanya n’abasanzwe mu gukemura ibibazo by’Abanyarwanda
Senateri Amb. Wellars Gasamagera na Depite Ben Niyonshuti barahiriye kwinjira mu Nteko Ishinga Amategeko y’u Rwanda
Amb. Gasamagera yinjiye muri Sena ahagarariye Ihuriro ry’Igihugu Nyunguranabitekerezo ry’Imitwe ya Politiki, asimbura Senateri Donatille Mukabalisa witabye Imana muri Nyakanga 2026
Depite Ben Niyonshuti we yinjiye mu Mutwe w’Abadepite ahagarariye urubyiruko
Amafoto yaranze umuhango wo kwakira indahiro ya Senateri Gasamagera Wellars na Depite Niyonshuti Ben