‘Ben’Imana’ yanditse amateka i Cannes, yazamuye sinema nyarwanda ku rundi rwego
Filime ‘Ben’Imana’ ya Marie-Clémentine Dusabejambo yanditse amateka ya sinema nyarwanda nyuma yo kwegukana ibihembo bikomeye mu Iserukiramuco Mpuzamahanga rya Filime rya Cannes mu Bufaransa.
Ben’Imana, filime ndende ya mbere ya Dusabejambo, yegukanye Caméra d’Or, igihembo gihabwa filime ya mbere y’umuyobozi wa filime yitwaye neza kurusha izindi muri Cannes.
Yanahawe FIPRESCI Prize mu cyiciro cya Un Certain Regard, ibihembo byombi bituma iba imwe mu ntsinzi zikomeye sinema nyarwanda yigeze igira ku ruhando mpuzamahanga.
Iyi ntsinzi yabaye intambwe ikomeye kuri Dusabejambo ku giti cye, ariko inatanga ikimenyetso gikomeye ku ruganda rwa sinema mu Rwanda.
Yerekanye ko filime zikozwe n’Abanyarwanda kandi zishingiye ku nkuru zabo zishobora kugera ku ruhando rukomeye rwa sinema ku Isi no guhangana n’ibihangano bituruka mu bihugu bimaze igihe kinini bifite inganda za sinema zikomeye.
Abakora muri sinema nyarwanda babonye intsinzi ya Ben’Imana nk’ikintu gishobora kongera icyizere ku banditsi, abayobozi ba filime, abakinnyi n’abatunganya amashusho bakiri bato.
Kugera kwa Ben’Imana i Cannes no kuhava yegukanye ibihembo bikomeye byanongeye agaciro k’ikiganiro kimaze igihe ku hazaza ha sinema nyarwanda, uko yakwigira umwuga ushobora kubeshaho abayikora, kubona ishoramari rihagije no kugeza inkuru z’u Rwanda ku isoko mpuzamahanga.