Venice Film Festival 2026 yatangaje urutonde rwahaye umwanya munini filime zigenga mu gihe Hollywood yagabanyije uruhare
Iserukiramuco Mpuzamahanga rya Sinema rya Venice ryatangaje gahunda yaryo ya 2026, igaragaza umwanya munini wahawe filime z’abahanzi bigenga mu gihe studio zikomeye za Hollywood zagabanyije uruhare rwazo.
Iserukiramuco rya 83 rya Venice ryateganyijwe kubera ku kirwa cya Lido kuva ku wa 2 kugeza ku wa 12 Nzeri 2026.
Abayobozi baryo batangaje ko bari bakiriye filime zigera ku 4,500 zasabye kwinjira mu iserukiramuco, umubare wagaragaje ko irushanwa ryo kugera muri Venice rikomeje gukomera.
Nubwo studio zikomeye zo muri Leta Zunze Ubumwe za Amerika zagabanyije uburemere bwazo muri gahunda y’uyu mwaka, amazina akomeye muri sinema yari ategerejwe i Venice.
Muri ayo mazina harimo George Clooney, Robert Pattinson, John Malkovich, Penélope Cruz na Rooney Mara.
Mu bayobozi ba filime bafite ibikorwa byatoranyijwe harimo Martin McDonagh, Florian Zeller, Danny Boyle, Werner Herzog na Hirokazu Kore-eda.
Filime ‘Ink’ ya Danny Boyle ni yo yari yatoranyijwe gufungura iserukiramuco, mu gihe Wild Horse Nine ya Martin McDonagh na Bunker ya Florian Zeller na zo zari mu zitezweho gukurura abakunzi ba sinema.
Gahunda ya Venice 2026 yanagaragaje impaka ku ruhare rw’abagore mu kuyobora filime, nyuma y’uko umubare w’abagore bayoboye filime zatoranyijwe mu marushanwa nyamukuru ugaragaye nk’ukiri hasi.
Nubwo Hollywood yagabanyije uruhare rwayo, urutonde rwatangajwe rwongeye kugaragaza Venice nk’imwe mu mbuga zikomeye filime nshya zimurikirwamo mbere y’ibihembo bikomeye bya sinema ku rwego mpuzamahanga.