Madamu Jeannette Kagame na Brigitte Macron bakiriwe n’Umugabekazi wa Cambodge

Madamu wa Perezida wa Repubulika, Jeannette Kagame, yakiriwe n’Umugabekazi wa Cambodge, Norodom Monineath Sihanouk, ku wa Mbere mu gitondo, tariki ya 16 Ugushyingo 2026, mu Ngoro Ndangamurage y’Umwami Norodom Sihanouk i Phnom Penh.
Uku guhura kwabaye mu bikorwa byaherekeje Inama ya 20 y’Abakuru b’Ibihugu na za Guverinoma bya Francophonie. Madamu Jeannette Kagame kandi yari kumwe na Brigitte Macron, umugore wa Perezida w’u Bufaransa, Emmanuel Macron.
Iyo ngoro ndangamurage, izwi ku izina rya Preah Borom Ratanak Kaudh, iri mu Ngoro y’Umwami wa Cambodge. Yitiriwe Umwami Norodom Sihanouk witabye Imana, ikaba yarasuwe n’abashyitsi bitabiriye ibikorwa byateguwe mu gihe cy’inama ya Francophonie yabereye mu murwa mukuru w’icyo gihugu.
Mu basuye iyo ngoro harimo abafasha b’Abakuru b’Ibihugu na za Guverinoma, ndetse n’abandi bafasha b’abayobozi bitabiriye iyo nama. Uruzinduko rwabo rwabaye ku burenganzira bahawe n’Umugabekazi, bayobowe na Dr Pich Chanmony Hun Manet, umufasha wa Minisitiri w’Intebe wa Cambodge, Hun Manet.
Ku wa Kabiri, tariki ya 17 Ugushyingo 2026, Ibiro bya Madamu wa Perezida wa Repubulika byatangaje ko mu bindi bikorwa Jeannette Kagame yitabiriye muri Cambodge harimo igikorwa ndangamuco cyateguwe n’amatsinda y’Abaguide bo muri icyo gihugu. Nyuma yacyo habaye ifunguro rya saa sita ryateguwe na Dr Pich Chanmony Hun Manet.
Inama ya 20 y’Abakuru b’Ibihugu na za Guverinoma bya Francophonie yabereye i Phnom Penh kuva ku wa 14 kugeza ku wa 16 Ugushyingo 2026 aho Perezida wa Repubulika y’u Rwanda, Paul Kagame, na Madamu Jeannette Kagame bayitabiriye.
Yasojwe ku wa Mbere, tariki ya 16 Ugushyingo, hemezwa ko Louise Mushikiwabo akomeza kuyobora Umuryango Mpuzamahanga w’Ibihugu bikoresha Igifaransa, OIF, kugeza mu mpera za 2027.
Madamu Jeannette Kagame ari kumwe n’Umugabekazi wa Cambodge, Norodom Monineath Sihanouk (hagati), n’abandi bashyitsi, ku Ngoro Ndangamurage y’Umwami Norodom Sihanouk
Umugabekazi wa Cambodge, Norodom Monineath Sihanouk, yakira Madamu Jeannette Kagame
Madamu Jeannette Kagame na Brigitte Macron atambagira Ingoro Ndangamurage y’Umwami Norodom Sihanouk
Madamu Jeannette Kagame ashyikirizwa impano i Phnom Penh
Madamu Jeannette Kagame mu ifoto y’urwibutso n’abamwakiriye
Madamu Jeannette Kagame yakirwa mu gikorwa ndangamuco cyateguwe n’amatsinda y’Abaguide bo muri Cambodge
Madamu Jeannette Kagame akurikirana igikorwa ndangamuco cyateguwe n’amatsinda y’Abaguide bo muri Cambodge
Madamu Jeannette Kagame n’Umunyamabanga wa Leta muri Minisiteri y’Urubyiruko n’Iterambere ry’Ubuhanzi, Umutoni Sandrine, berekwa bimwe mu biranga umuco wa Cambodge
Madamu Jeannette Kagame mu ifoto y’urwibutso n’abandi bitabiriye ibirori
Ababyinnyi b’imbyino gakondo za Cambodge basusurutsa abashyitsi