Perezida Kagame na Madamu bitabiriye ifungurwa ry’Inama ya 20 ya Francophonie

Perezida wa Repubulika y’u Rwanda, Paul Kagame, na Madamu Jeannette Kagame bitabiriye umuhango wo gufungura ku mugaragaro Inama ya 20 y’Abakuru b’Ibihugu na za Guverinoma bihuriye mu Muryango Mpuzamahanga w’Ibihugu Bikoresha Ururimi rw’Igifaransa (Francophonie), wabereye i Phnom Penh muri Cambodge, mu gitondo cyo kuri iki Cyumweru, tariki ya 15 Ugushyingo 2026.
Uyu muhango wabereye mu nyubako ya Chroy Changvar yakira inama n’amamurikagurisha mpuzamahanga (Chroy Changvar International Convention and Exhibition Centre).
Ni ibikorwa byitabiriwe n’Umwami wa Cambodge, Norodom Sihamoni, Minisitiri w’Intebe w’icyo gihugu, Hun Manet, Umunyamabanga Mukuru wa Francophonie, Louise Mushikiwabo, n’abandi bakuru b’ibihugu na za guverinoma.
Mu bayobozi bakiriwe harimo ba Perezida ba Sénégal, Mauritanie, Repubulika Iharanira Demokarasi ya Congo (RDC), Laos, Centrafrique, Togo na Comores, Perezida w’u Bufaransa, Emmanuel Macron, ndetse na Minisitiri w’Intebe wa Arménie na Guverineri Mukuru wa Canada.
Ni ubwa mbere Cambodge yakiriye Inama y’Abakuru b’Ibihugu na za Guverinoma bya Francophonie. Iyi nama igarutse ku mugabane wa Aziya nyuma y’imyaka igera kuri 30, kuko yaherukaga kuhabera mu 1997, i Hanoi muri Vietnam.
Iyi nama y’umuryango ugizwe n’ibihugu na za guverinoma 90 ifite insanganyamatsiko igira iti: “Kongera gushora imari mu mahoro hagamijwe iterambere risangiwe n’ituze rirambye.”
Mu muhango wo gufungura iyi nama, herekanywe ubutumwa bw’amashusho bw’Umunyamabanga Mukuru w’Umuryango w’Abibumbye, António Guterres, hanatangwa imbwirwaruhame na Minisitiri w’Intebe Hun Manet, Perezida Emmanuel Macron na Louise Mushikiwabo ubereye Umunyamabanga Mukuru uyu muryango.
U Bufaransa, bwari buyoboye Inama y’Abakuru b’Ibihugu na za Guverinoma bya Francophonie kuva ku nshuro yayo ya 19 yabereye muri icyo gihugu mu 2024, bwahise bushyikiriza Cambodge ubwo buyobozi.
Umwami Norodom Sihamoni, wafunguye iyi nama ku mugaragaro, yibukije ko Francophonie yashingiwe i Niamey muri Niger mu 1970 n’abayobozi bane: Léopold Sédar Senghor wa Sénégal, Habib Bourguiba wa Tunisia, Hamani Diori wa Niger na se, Umwami Norodom Sihanouk wa Cambodge.
Yagize ati: “Kuba Francophonie ikorera inama yayo y’abakuru b’ibihugu muri Cambodge ku nshuro ya mbere, ni uguhura k’ururimi rwazengurutse isi n’abaturage banyuze mu bigeragezo byinshi, ariko batigeze na rimwe batera umugongo umuco wabo, ukwemera kwabo cyangwa indangagaciro zabo baha agaciro kurusha izindi.”
Yanasuhuje by’umwihariko Afurika, ati: “Turasuhuza by’umwihariko Afurika, ari yo Francophonie ikesha igice kinini cy’imbaraga n’ubusore byayo.”
Umwami Norodom Sihamoni yagarutse ku mateka ya Cambodge, agaragaza uko iki gihugu cyanyuze mu ntambara n’amakuba, kikongera kwiyubaka.
Yagize ati: “Turi Abakhmer mu buryo bwuzuye, turi Abanyaziya mu buryo bwuzuye kandi turi Aba-francophone mu buryo bwuzuye.”
Yifashishije inyigisho z’idini ry’Aba-budists, agaragaza ko abaturage ba Cambodge basobanukiwe ko igihugu kitubakirwa ku kwihorera.
Yagize ati: “Urwango ntirwigera rushira bitewe n’urwango, ahubwo urukundo ni rwo rutuma rushira.”
Yongeyeho ati: “Muri Cambodge, amahoro atangirira ku kumwenyurira undi muntu buri gitondo no kumuramburira ikiganza.”
Umuhango wo gufungura iyi nama wasojwe n’imbyino n’imikino gakondo byo muri Cambodge.
Biteganyijwe ko iyi nama izakomeza ku wa Mbere, tariki ya 16 Ugushyingo 2026. Louise Mushikiwabo yatangaje ko mu gitondo cy’uwo munsi, abakuru b’ibihugu na za guverinoma bazagirana inama mu muhezo, bigire hamwe uburyo bwo kurushaho gushimangira amahoro.
Perezida Kagame na Madamu Jeannette Kagame bagera ahabereye umuhango wo gufungura Inama ya 20 ya Francophonie i Phnom Penh
Perezida Kagame na Madamu Jeannette Kagame binjira ahabereye umuhango wo gufungura inama
Perezida Kagame na Madamu Jeannette Kagame bari kumwe na Perezida Emmanuel Macron, Louise Mushikiwabo, Umwami Norodom Sihamoni, Minisitiri w’Intebe Hun Manet n’abandi bayobozi, bakurikiye umuhango wo gufungura inama
Perezida Kagame ari kumwe n’Umwami Norodom Sihamoni, Minisitiri w’Intebe Hun Manet, Louise Mushikiwabo n’abandi bayobozi bitabiriye Inama ya 20 ya Francophonie, mu ifoto y’urwibutso
Perezida wa Repubulika y’u Rwanda, Paul Kagame, na Madamu Jeannette Kagame bakirwa n’Umwami wa Cambodge, Norodom Sihamoni, Umunyamabanga Mukuru wa OIF, Louise Mushikiwabo, na Minisitiri w’Intebe wa Cambodge, Hun Manet
Umuhango wo gufungura Inama ya 20 ya Francophonie wabereye muri Chroy Changvar International Convention and Exhibition Centre i Phnom Penh
Amabendera y’ibihugu bigize Francophonie n’ikirango cy’Inama ya 20 ya Francophonie i Phnom Penh
Ababyinnyi b’imbyino gakondo za Cambodge basusurukije abitabiriye umuhango wo gufungura inama
Ikirango cy’Inama ya 20 ya Francophonie imbere y’amabendera y’ibihugu bigize uyu muryango
Imbyino gakondo za Cambodge zasoje umuhango wo gufungura Inama ya 20 ya Francophonie