Perezida Kagame na Minisitiri w’Intebe wa Jamaica baganiriye ku kwagura ubufatanye hagati y’ibihugu byombi
Perezida wa Repubulika y’u Rwanda, Paul Kagame, yagiranye ibiganiro na Minisitiri w’Intebe wa Jamaica, Andrew Holness, byibanze ku gushimangira umubano umaze igihe hagati y’ibihugu byombi no kwagura ubufatanye mu nzego zirimo ubuzima, ingabo n’ubukerarugendo.
Ibi biganiro byabaye ku wa Mbere, tariki ya 2 Ugushyingo 2026, ku ruhande rw’Inama y’Abakuru b’Ibihugu na za Guverinoma bigize Umuryango wa Commonwealth (CHOGM 2026), iri kubera mu gihugu cya Antigua na Barbuda.
Perezida Kagame yatangaje ko ibiganiro yagiranye na Andrew Holness byibanze ku mubano usanzwe hagati y’u Rwanda na Jamaica, ndetse n’uburyo ibihugu byombi byakomeza kuwuteza imbere, by’umwihariko mu nzego bifitemo inyungu zihuriweho.
Minisitiri w’Intebe Andrew Holness na we yavuze ko guhura na Perezida Kagame byabahaye umwanya wo gusuzuma uburyo umubano w’ibihugu byombi warushaho gukomera, kungurana ibitekerezo ku bibazo bireba ibihugu byabo no kurebera hamwe amahirwe mashya y’ubufatanye.
Holness yashimangiye ko Jamaica ikomeje gushaka no kubaka ubufatanye n’ibihugu byo mu bindi bice by’Isi, kuko bishobora gufungura amahirwe mashya mu bucuruzi, ishoramari n’iterambere rigirira akamaro abaturage.
Perezida Kagame yaganiriye na Minisitiri w’Intebe wa Jamaica ku bufatanye mu by’ubuzima, ingabo n’ubukerarugendo
Umubano w’u Rwanda na Jamaica usanzwe ushingiye ku bufatanye mu nzego zitandukanye. Muri Mata 2022, Perezida Kagame yagiriye uruzinduko rw’iminsi itatu muri Jamaica, aho yagiranye ibiganiro n’abayobozi b’icyo gihugu ku kurushaho guteza imbere umubano w’ibihugu byombi.
Kagame yanaganiriye n’umuyobozi w’Umuryango Mpuzamahanga w’Ubucuruzi
Nyuma yo guhura na Minisitiri w’Intebe wa Jamaica, Perezida Kagame yanagiranye ibiganiro na Dr. Ngozi Okonjo-Iweala, Umuyobozi Mukuru w’Umuryango Mpuzamahanga w’Ubucuruzi (WTO).
Ibyo biganiro byibanze ku bufatanye busanzwe hagati y’u Rwanda na WTO, ndetse n’akamaro ko guteza imbere ubucuruzi n’ishoramari mu karere hagamijwe kugera ku iterambere rirambye.
Izi nama zibaye mu gihe abayobozi b’ibihugu bigize Commonwealth bateraniye muri Antigua na Barbuda, mu nama ya 28 y’uyu muryango, iteganyijwe kuva ku wa 1 kugeza ku wa 4 Ugushyingo 2026.
Iyi nama ifite insanganyamatsiko yibanda ku kwihutisha ubufatanye n’ishoramari bigamije guteza imbere ubukungu n’imibereho myiza y’abaturage b’ibihugu bigize Commonwealth.
Perezida Kagame na Minisitiri w’Intebe wa Jamaica baganiriye ku kwagura ubufatanye hagati y’ibihugu byombi
Kagame yanaganiriye n’umuyobozi w’Umuryango Mpuzamahanga w’Ubucuruzi