Putin yakiriye intumwa ya Trump nyuma yo kurekura Umunyamerika wari ufungiwe mu Burusiya
Perezida w’u Burusiya, Vladimir Putin, yagiranye ibiganiro n’intumwa idasanzwe ya Perezida Donald Trump, Steve Witkoff, byagarutse ku irekurwa ry’Umunyamerika Stephen Hubbard no ku biganiro bigamije gukemura intambara yo muri Ukraine.
Perezida w’u Burusiya, Vladimir Putin, ku wa Gatatu, tariki ya 21 Ukwakira 2026, yakiriye intumwa idasanzwe ya Perezida wa Amerika, Donald Trump, Steve Witkoff, mu ngoro ya Konstantinovsky i St Petersburg, baganira ku ngingo zirimo intambara yo muri Ukraine n’irekurwa ry’Umunyamerika wari ufungiwe mu Burusiya.
Ibiganiro byitabiriwe kandi na Yuri Ushakov, umujyanama wa Putin, hamwe n’intumwa Kirill Dmitriev.
Mu gutangira ibiganiro, Witkoff yashimiye Putin mu izina rya Perezida Trump na Leta Zunze Ubumwe za Amerika, kubera kurekura Stephen Hubbard, Umunyamerika wari ufungiwe mu Burusiya.
Witkoff yagize ati: “Ni wowe utumye asubira mu rugo iwe, mu muryango we.”
Putin yamusubije ati: “Ari ku Kibuga cy’Indege cya Pulkovo.”
Witkoff yavuze ko yari buhurire na Hubbard kuri icyo kibuga cy’indege.
Ku wa Kabiri, Trump yari yabwiye abanyamakuru ko yaganiriye na Putin igihe kirekire ku kibazo cya Hubbard, amusaba kumurekura.
Hubbard yari yarakatiwe igifungo cy’imyaka itandatu
Stephen Hubbard, wahoze ari umwarimu muri Leta ya Michigan, uri mu kigero cy’imyaka 70, yakatiwe mu Ukwakira 2024 igifungo cy’imyaka itandatu n’amezi icumi, nyuma y’urubanza rwabereye mu muhezo.
Yahamijwe icyaha cyo kurwanira Ukraine nk’umusirikare w’umucancuro.
Steve Witkoff mu biganiro yagiranye na Perezida Putin.
Ubushinjacyaha bwavuze ko yari yarinjiye mu mutwe w’ingabo zishinzwe kurinda agace ka Izium muri Ukraine, aza gufatwa muri Mata 2022.
Ubuyobozi bwa Perezida Joe Biden bwari bwarashyize Hubbard mu Banyamerika bufata nk’abafunzwe mu buryo bunyuranyije n’amategeko, mu gihe umuryango we wahakanaga ibyaha yashinjwaga.
Hubbard abaye Umunyamerika wa kabiri urekuriwe mu Burusiya mu gihe cy’amezi agera kuri abiri, nyuma ya Robert Gilman, wahoze mu mutwe w’ingabo za Amerika uzwi nka Marines, warekuwe muri Kanama.
Umuryango Foley Foundation uvuga ko Abanyamerika bagera kuri 24 bakiri muri gereza zo mu Burusiya.
Witkoff yasabye gusubukura ibiganiro by’amahoro
Witkoff yari yabonanye na Perezida wa Ukraine, Volodymyr Zelensky, i Oslo muri Norvège ku wa Kabiri, mbere yo kujya mu Burusiya.
Yabwiye Putin ko ibiganiro byo muri Oslo byatanze umusaruro, amushyikiriza inyandiko zirimo ibyifuzo byo gukemura amakimbirane, amusaba gusuzuma uburyo bwo gusubukura ibiganiro bihuza u Burusiya, Ukraine na Amerika.
Putin yagize ati: “Ndifuza kubasaba kugeza kuri Perezida Trump amagambo yanjye y’ishimwe rivuye ku mutima kubera imbaraga ashyira mu gukemura ikibazo cyo muri Ukraine.”
Witkoff yanashimiye Putin gukuraho imbogamizi ku kohereza mazutu mu mahanga.
Putin yavuze ko ubwato bwa mbere butwaye toni zigera ku 40.000 za mazutu bwari guhaguruka mu minsi ibiri cyangwa itatu, anavuga ko u Burusiya bushobora guha abahinzi bo muri Amerika ifumbire.
Mu cyumweru gishize, Trump yakuyeho ikoreshwa ry’ibihano byari byarafatiwe u Burusiya mu itegeko Kongere yemeje mu rwego rwo gushyigikira Ukraine, anatangaza amasezerano yo gutumiza mazutu ivuye mu Burusiya.
Intumwa z’u Burusiya n’iza Amerika zicaye ku meza manini y’uruziga mu biganiro.
Perezida Vladimir Putin yicaye ku meza ari kumwe n’abandi bayobozi babiri b’u Burusiya.