Minisitiri w’Intebe Dr. Nsengiyumva yitabiriye inama ya COMESA muri Zimbabwe
Minisitiri w’Intebe, Dr. Nsengiyumva Justin, yifatanyije n’abandi bayobozi b’ibihugu byo mu karere mu nama ya 25 y’Abakuru b’Ibihugu na za Guverinoma bigize COMESA.
Iyi nama ya 25 y’Abakuru b’Ibihugu na za Guverinoma bigize Umuryango w’Isoko Rusange rya Afurika y’Iburasirazuba n’Amajyepfo, COMESA, iri kubera i Harare muri Zimbabwe.
Iyi nama yibanze ku gushimangira ubufatanye mu bukungu bw’akarere, kongera ishoramari no kwihutisha iterambere ry’inganda zikorera mu nzego zitandukanye. Abayobozi bayitabiriye baganiriye ku ngamba zatuma ibihugu bigize uyu muryango birushaho gukoresha amahirwe bihuriyeho mu bucuruzi no guteza imbere ubukungu.
Iyi nama ifite insanganyamatsiko igira iti: “Isoko Rimwe, Ejo Hazaza Hamwe”, igamije gushimangira icyerekezo cyo kubaka akarere gafite ubushobozi bwo guhangana ku masoko mpuzamahanga.
COMESA ni umuryango w’ibihugu bya Afurika ugamije guteza imbere ubucuruzi, koroshya urujya n’uruza rw’ibicuruzwa no gushimangira ubufatanye mu bukungu. Kongera ishoramari no guteza imbere inganda ni bimwe mu bishobora gufasha ibihugu biwugize kongera umusaruro, guhanga imirimo no kwagura amasoko.
Kwitabira iyi nama biha u Rwanda umwanya wo gukomeza gukorana n’ibindi bihugu mu gushaka ibisubizo bihuriweho ku bibazo by’ubukungu no guteza imbere ubucuruzi bwambukiranya imipaka. Icyakora, kugira ngo izi gahunda zitange umusaruro, bizasaba ko ibihugu bishyira mu bikorwa ibyemezo bizafatirwa muri iyi nama.
Minisitiri w’Intebe Dr. Nsengimana Justin yitabiriye inama ya 25 y’Abakuru b’Ibihugu na za Guverinoma bigize Umuryango wa COMESA
Inama ya 25 y’Abakuru b’Ibihugu na za Guverinoma bigize Umuryango wa COMESA
Abakuru b’Ibihugu na za Guverinoma bitabiriye inama ya 25 ya COMESA