U Rwanda mu bihugu bitanu bya mbere ku isi bikundirwa ibyiza nyaburanga
U Rwanda rwaje ku mwanya wa gatanu ku isi mu bihugu ba mukerarugendo bifuza gusura kubera ubwiza bw’ibidukikije n’inyamaswa, mu bihembo bya Wanderlust Reader Travel Awards 2026 byatangiwe i Londres mu Bwongereza, mu gihe rwari runitabiriye imurikabikorwa mpuzamahanga ry’ubukerarugendo rya World Travel Market (WTM) 2026.
Ibi bihembo bitegurwa n’ikinyamakuru Wanderlust cyo mu Bwongereza, bitangwa hashingiwe ku majwi y’abasomyi bacyo bakunda ingendo n’ubukerarugendo.
Mu cyiciro cya ‘Most Desirable Destination for Nature & Wildlife’, Afurika y’Epfo yaje ku mwanya wa mbere, ikurikirwa na Brésil, Australia na Kenya, mu gihe u Rwanda rwafashe umwanya wa gatanu.
Ibindi bihugu byaje mu icumi bya mbere ni Colombia, Costa Rica, Tanzania, Canada na Indonesia.
Ambasade y’u Rwanda mu Bwongereza yatangaje ko uyu mwanya ugaragaza agaciro k’imbaraga u Rwanda rukomeje gushyira mu kubungabunga urusobe rw’ibinyabuzima no guteza imbere ubukerarugendo burambye.
Ibi bihembo byatanzwe ku nshuro ya 25, aho abasomyi 251.461 bitabiriye amatora, batanga amajwi arenga miliyoni 8,2 mu byiciro bitandukanye.
U Rwanda rukomeje gukurura ba mukerarugendo kubera ingagi zo mu Birunga, inyamaswa eshanu nini zizwi nka Big Five ziba muri Pariki y’Akagera, ndetse n’urusobe rw’ibinyabuzima byo muri Pariki z’Igihugu za Nyungwe na Gishwati-Mukura.
Muri icyo gihe, u Rwanda rwari runitabiriye imurikabikorwa rya World Travel Market London 2026, ryabaye kuva ku wa 3 kugeza ku wa 5 Ugushyingo 2026, mu nyubako ya ExCeL London mu Bwongereza.
Muri iri murikabikorwa rihuza inzego n’ibigo bikora mu bukerarugendo hirya no hino ku isi, u Rwanda rwamuritse ibyiza nyaburanga byarwo, umuco n’umurage warwo, ndetse n’ahantu hatandukanye ba mukerarugendo bashobora gusura.
Ambasade y’u Rwanda mu Bwongereza yasangije abamukurikira amafoto agaragaza abahagarariye u Rwanda mu imurikabikorwa, bari ku cyicaro cyateguwe mu rwego rwo kumenyekanisha gahunda ya Visit Rwanda.
World Travel Market ni rimwe mu mamurikabikorwa akomeye y’ubukerarugendo ku isi, rihuza ibigo by’ubukerarugendo, abashoramari, abategura ingendo n’abandi bafatanyabikorwa kugira ngo baganire ku mahirwe y’ubucuruzi n’ubufatanye.
Kwitabira iri murikabikorwa no kuza mu bihugu bitanu bya mbere mu bihembo bya Wanderlust byahaye u Rwanda amahirwe yo kurushaho kumenyekanisha ibyiza nyaburanga byarwo ku isoko mpuzamahanga.
Igihembo u Rwanda rwahawe nyuma yo kuza ku mwanya wa gatanu mu cyiciro cya ‘Most Desirable Destination for Nature & Wildlife’ mu bihembo bya Wanderlust Reader Travel Awards 2026
U Rwanda rwashyikirijwe igihembo cya Wanderlust Reader Travel Awards 2026 i Londres mu Bwongereza
Abahagarariye u Rwanda muri World Travel Market London 2026 bishimira igihembo cya Wanderlust
Icyicaro cy’ikinyamakuru Wanderlust muri World Travel Market London 2026
Icyicaro cya Visit Rwanda mu imurikabikorwa rya World Travel Market London 2026, muri ExCeL London
Abitabiriye imurikabikorwa basura icyicaro cya Visit Rwanda
Rwanda Chamber of Tourism na yo yari mu bitabiriye imurikabikorwa rya World Travel Market London 2026