Ingengo y’Imari ya 2026/27: Miliyari 7,796 Frw zizihutisha ubuhinzi, inganda n’ihangwa ry’imirimo
Inama y’Abaminisitiri yateranye ku wa 8 Kamena 2026, iyobowe na Perezida Paul Kagame, yemeje Umushinga w’Itegeko rigena ingengo y’imari ya Leta y’umwaka wa 2026/27, uzibanda ku gukomeza kubaka ubukungu butajegajega no kwihutisha iterambere ry’igihugu.
Iyi ngengo y’imari nshya izibanda ku kongera umusaruro w’ubuhinzi, guteza imbere inganda, kwihutisha ihangwa ry’imirimo no kubaka ubukungu bufite ubushobozi bwo guhangana n’ibibazo bitandukanye bishobora guhungabanya iterambere.
Ni ingengo y’imari ije mu gihe u Rwanda rukomeje gushyira imbere gahunda z’iterambere zishingiye kuri NST2 na Vision 2050, aho Leta igamije gukomeza guteza imbere ubukungu, imibereho myiza y’abaturage n’imiyoborere myiza.
Minisiteri y’Imari n’Igenamigambi yagaragaje ko ingengo y’imari ya 2026/27 iteganyijwe kugera kuri miliyari 7,796.3 Frw, ikaba yiyongereye ugereranyije n’ingengo y’imari ivuguruye ya 2025/26 yari miliyari 6,952.1 Frw.
Ubu bwiyongere buzafasha Leta gukomeza gushora imari mu mishinga y’ingenzi irimo ibikorwa remezo, guteza imbere ubwikorezi bwo mu kirere, kongera umusaruro w’ubuhinzi no gushyigikira gahunda zigamije kugabanya ingaruka z’ihungabana ry’ibiciro ku isoko mpuzamahanga.
Mu buhinzi, iyi ngengo y’imari izashyira imbaraga mu kongera umusaruro, gushyigikira abahinzi, guteza imbere ikoreshwa ry’ifumbire n’inyongeramusaruro, ndetse no gufasha urwego rw’ubuhinzi guhangana n’ingaruka z’imihindagurikire y’ibihe.
Mu nganda, Leta izakomeza gushyigikira ibikorwa bigamije kongera umusaruro ukorerwa imbere mu gihugu, guteza imbere ibikorerwa mu Rwanda no kongera ubushobozi bw’igihugu bwo kohereza ibicuruzwa hanze. Ibi bizafasha kugabanya icyuho kiri hagati y’ibyo u Rwanda rutumiza n’ibyo rwohereza hanze.
Ingengo y’imari ya 2026/27 kandi izibanda ku ihangwa ry’imirimo, cyane cyane imirimo irambye kandi ifite agaciro ku rubyiruko. Ibi bizajyana no guteza imbere ubumenyi, uburezi bufite ireme, amahugurwa y’imyuga n’ubumenyingiro, ndetse no gushyigikira abikorera nk’umusemburo w’iterambere.
Mu rwego rw’imibereho myiza, Leta izakomeza gushora imari mu burezi, ubuzima, imirire, kurwanya igwingira, gufasha abaturage kwikura mu bukene no kongera ubushobozi bw’imiryango kugira ngo irusheho kwihaza.
Iyi ngengo y’imari kandi izakomeza gushyigikira serivisi zihabwa abaturage, imicungire myiza y’imari ya Leta, umutekano, ubutabera, imiyoborere myiza n’ubufatanye mpuzamahanga.
Ku ruhande rw’amafaranga azakoreshwa, igice kinini kizajya mu bikorwa bya Leta bya buri munsi birimo imishahara na serivisi zisanzwe, mu gihe andi mafaranga azashyirwa mu bikorwa by’iterambere birimo imishinga minini y’ibikorwa remezo n’ishoramari rya Leta.
Iyi ngengo y’imari igaragaza ko Leta ikomeje gushyira imbere iterambere rishingiye ku bukungu budaheza, kongera ubushobozi bw’igihugu no kurinda umutekano w’ubukungu bw’u Rwanda mu bihe Isi ikomeje guhura n’ibibazo birimo imihindagurikire y’ibihe, intambara, izamuka ry’ibiciro n’ihungabana ry’ubucuruzi mpuzamahanga.
Biteganyijwe ko iyi ngengo y’imari izaba imwe mu nkingi zizafasha u Rwanda gukomeza urugendo rwo kubaka ubukungu bukomeye, bushingiye ku musaruro, ikoranabuhanga, ishoramari, imirimo n’imibereho myiza y’abaturage.