U Rwanda rwaje ku isonga mu bihugu 40 byo munsi ya Sahara byasuzumwe na Banki y’Isi
U Rwanda rwaje ku mwanya wa mbere mu bihugu 40 byo muri Afurika yo munsi y’Ubutayu bwa Sahara byasuzumwe na Banki y’Isi mu cyegeranyo cyayo kigaragaza uko ibihugu byitwaye mu gushyiraho politiki no kubaka inzego zifasha iterambere ry’ubukungu.
Imbonerahamwe ya Banki y’Isi igaragaza amanota ibihugu byo muri Afurika yo munsi y’Ubutayu bwa Sahara byemerewe inkunga ya IDA byabonye mu isuzuma rya CPIA ryo mu 2025.
Ibi bikubiye muri raporo ya Banki y’Isi yiswe “CPIA Africa, 2026: Maintaining Reform Momentum with Less Money”, yasohotse ku wa 30 Nzeri 2026, ikubiyemo isuzuma ryakozwe ku mwaka wa 2025.
U Rwanda rwagize amanota 4,2 kuri 6 ashoboka, angana n’ayo rwari rwabonye mu mwaka wabanje, rukurikirwa na Côte d’Ivoire, Benin, Cabo Verde na Kenya.
Impuzandengo y’amanota y’ibihugu byo muri Afurika yo munsi y’Ubutayu bwa Sahara byemerewe inkunga y’Ikigega Mpuzamahanga Gitsura Amajyambere (IDA), kigenewe ibihugu bikennye kurusha ibindi, yari 3,1.
Isuzuma rya Banki y’Isi rizwi nka CPIA rireba ibyiciro bine birimo imicungire y’ubukungu, politiki zigena imiterere y’ubukungu, politiki zo guteza imbere imibereho idaheza n’uburinganire, ndetse n’imicungire n’imikorere y’inzego za Leta.
Mu manota u Rwanda rwabonye, rwagize 4,2 mu micungire y’ubukungu, 4,3 muri politiki zigena imiterere y’ubukungu, na 4,5 muri politiki zo guteza imbere imibereho idaheza n’uburinganire, ari na ho rwitwaye neza kurusha mu bindi byiciro.
Mu micungire n’imikorere y’inzego za Leta, rwagize amanota 3,9, akaba ari yo make rwabonye muri ibi byiciro bine.
Amakuru ya Banki y’Isi agaragaza kandi ko u Rwanda rufite abaturage miliyoni 14,6, umusaruro mbumbe w’igihugu ungana na miliyari 16,4 z’amadolari ya Amerika, naho umusaruro mbumbe ugabanyijwe ku muturage ukaba amadolari 1.123,7.
Igipimo mpuzamahanga cy’ubukene, gishingiye ku madolari 3 ku munsi hakurikijwe ubushobozi bwo kugura bw’ifaranga mu 2021, kigaragaza ko ubukene mu Rwanda buri kuri 38,6%.