U Rwanda rwashyizwe mu bihugu byashyizeho ingamba zihamye z’imyigire

Bruno I. Bagambiki ·

U Rwanda rwashyizwe mu bihugu byashyizeho ingamba zihamye z’imyigire

Raporo ya UNICEF yashyize u Rwanda mu cyiciro cy’ibihugu byamaze gushyiraho ingamba zihamye zo guteza imbere imyigire y’ibanze, rugaragaza amanota 3,3 ku gipimo cy’ibyiciro bine.

U Rwanda rwabonye amanota ahwanye na 82.5% ku gipimo cyerekana ingamba n’uburyo ibihugu bishyiraho mu gufasha abana kumenya gusoma, kwandika no kubara, nk’uko bigaragazwa na raporo ya 2026 yiswe “Test to Teach”.

Iyi raporo yakozwe na UNICEF ku bufatanye na Hempel Foundation, ikurikirana ibikorwa bya Leta mu guteza imbere imyigire y’ibanze mu bihugu 123 bifite amikoro make n’ibiri mu nzira y’amajyambere.

Mu rutonde rw’u Rwanda, 82.5% arushyira mu cyiciro cya “Established”, kigaragaza ko hari ingamba n’uburyo byamaze gushyirwaho. Iyi mibare iruta impuzandengo y’akarere ka Afurika y’Iburasirazuba n’Amajyepfo ingana na 72.5%, n’iy’ibihugu bikennye iri kuri 65%.

U Rwanda rwabonye 92.5% mu kugarura abana bose mu ishuri no gukurikirana imyigire yabo, 92.5% mu gusuzuma urwego bagezeho, na 87.5% mu kwibanda ku masomo y’ingenzi. Mu kunoza uburyo bwo kwigisha rwabonye 75%, naho mu guteza imbere ubuzima bwo mu mutwe n’imibereho myiza y’abanyeshuri rubona 70%.

Raporo igaragaza ko u Rwanda rukora isuzuma ry’abanyeshuri buri mwaka, kandi amakuru arivamo akoreshwa mu igenamigambi no kunoza imyigishirize. Icyakora, irasaba kwagura no gusuzuma neza gahunda zishingiye ku bimenyetso bifatika zifasha abana bafite intege nke mu myigire.

Mu rwego rwo kunoza imyigire, raporo inagaragaza ko gahunda yo gufasha abarimu mu myigishirize iteguye neza ishyirwa mu bikorwa mu turere turindwi, mu gihe gahunda y’inyigisho z’inyongera mu biruhuko igera mu turere twose uko ari 30.

UNICEF yashyize u Rwanda mu bihugu byashyizeho ingamba z’imyigire zihamye

IBANZE.com

Fungura JavaScript kugira ngo ukoreshe urubuga rwose.

Subira ahabanza