Ingabo na Polisi by’u Rwanda byafashije abaturage 946 kubona ubuvuzi ku buntu
Ingabo na Polisi by’u Rwanda biri mu butumwa bw’Umuryango w’Abibumbye bwo kubungabunga amahoro muri Sudani y’Epfo (UNMISS), byahaye ubuvuzi ku buntu abaturage 946 bo mu gace ka Luri-Rokwe n’ahagakikije, mu Karere ka Juba.
Iki gikorwa cyamaze iminsi ibiri, cyasojwe ku wa Kane, tariki ya 15 Ukwakira 2026, kibera ku Kigo Nderabuzima cya Luri-Rokwe, mu rwego rwo gufasha abaturage kubona serivisi z’ubuzima.
Cyateguwe n’Ingabo z’u Rwanda zo mu matsinda RWANBATT-1 na RWANBATT-3, ku bufatanye n’abapolisi b’u Rwanda bagize itsinda RWAFPU3-8, Umuryango Society for Family Health South Sudan (SFH) n’inzego z’ubuzima zo muri Sudani y’Epfo.
Mu baturage 946 bahawe ubuvuzi, harimo abagore 609 n’abagabo 337, basuzumwe indwara zitandukanye, bahabwa imiti n’ubundi bufasha hakurikijwe ibibazo by’ubuzima bari bafite.
Serivisi zatanzwe zirimo kuvura indwara z’amaso n’iz’amenyo, iz’umuvuduko ukabije w’amaraso, diyabete n’indwara ziterwa n’isuku nke. Hatanzwe kandi serivisi zo kwita ku bagore batwite, gusuzuma abarwayi no kubaha imiti.
Abaturage bahawe n’ubukangurambaga ku bimenyetso by’icyorezo cya Ebola n’uburyo bwo kucyirinda, mu gihe hari impungenge z’ikwirakwira ryacyo mu bihugu bituranye na Sudani y’Epfo.
Mu muhango wo gusoza iki gikorwa, Umuyobozi Mukuru muri Minisiteri y’Ubuzima ya Sudani y’Epfo, Dr James Wanyi Tom, yashimiye Ingabo na Polisi by’u Rwanda ku ruhare bigira mu guteza imbere ubuzima bw’abaturage.
Yagize ati: “Turabashimira ibikorwa byanyu byiza byo kwita ku baturage mushinzwe gucungira umutekano mubaha ubuvuzi, ibyo mukora mu guteza imbere ubuvuzi birazwi kandi turabibashimira.”
Yagaragaje ko agace kakorewemo iki gikorwa gafite imbogamizi mu bijyanye no kubona ubuvuzi, zirimo ibura ry’imiti n’abaganga bafite ubunararibonye buhagije.
Yashimangiye ko ubuyobozi bwa Sudani y’Epfo buzakomeza gukorana n’Ingabo z’u Rwanda mu bikorwa bya gisirikare ndetse n’iby’iterambere ry’abaturage.
Umuyobozi wungirije w’itsinda RWANBATT-3, Lt Col Maurice Kayinamura, yashimiye Minisiteri y’Ubuzima, abaganga n’abaturage bitabiriye iki gikorwa.
Yongeye gushimangira ko u Rwanda ruzakomeza gufasha abaturage bafite ibibazo by’imibereho, cyane cyane mu kuborohereza kubona serivisi z’ubuzima mu gihe ingabo zarwo zizaba zikiri muri ubu butumwa.
Ku ruhande rwa Polisi, Umuyobozi w’itsinda ry’abapolisi b’u Rwanda bari i Juba, SSP Dativa Iribagiza, yashimiye inzego z’ubuzima n’ubuyobozi bw’ibanze ku bufatanye bwagaragaye mu gutegura iki gikorwa.
Yasabye abaturage gukomeza kwitabira serivisi z’ubuzima ziboneka mu gace batuyemo, anabizeza ko bazakomeza guhabwa ubufasha mu by’ubuvuzi.
Ingabo na Polisi by’u Rwanda byafashije abaturage 946 kubona ubuvuzi ku buntu
Umwe mu baturage bahawe ubuvuzi, Abalo Yunis, yashimiye Ingabo na Polisi by’u Rwanda ku kuba baramufashije kubona ubuvuzi ku buntu.
Uyu mubyeyi yavuze ko we n’abana be bari bamaze igihe bafite ibibazo by’ubuzima, ariko bakishimira kuba barabonye abaganga babavura batabanje kwishyura.
Yasabye ko ibikorwa nk’ibi byakomeza kugira ngo n’abandi baturage bafite ubushobozi buke babashe kubona ubuvuzi, anizeza ubufatanye n’abari mu butumwa bw’amahoro.
Iki gikorwa ni kimwe mu bikorwa by’ubufasha Ingabo na Polisi by’u Rwanda bikorera abaturage bo mu bihugu byoherejwemo kubungabunga amahoro, byiyongera ku nshingano zabyo zo kurinda abasivili no kugarura umutekano.
Binyuze mu bikorwa by’ubuvuzi, kwigisha abaturage kwirinda indwara no gufasha abatishoboye, inzego z’umutekano z’u Rwanda zigira uruhare mu kuzamura imibereho y’abaturage no gushimangira umubano hagati yabo n’abari mu butumwa bw’amahoro.