Nigera: Abantu 37 bashinjwaga ubucukuzi bw’amabuye y’agaciro butemewe bapfiriye muri gereza
Urwego rushinzwe umutekano no kurengera abaturage muri Nigeria, NSCDC, rwatangaje ko abagabo n’abasore 37 bapfiriye muri gereza, imiryango n’inshuti babyukira mu myigaragambyo naho Leta ya Nigeria ishyiraho iperereza ryihutirwa kandi ryimbitse ku cyateye iri sanganya.
Abantu babarirwa hagati ya 65 na 67 nibo bafunzwe bakekwaho ubucukuzi bw’amabuye y’agaciro butemewe n’amategeko mu gace kazwiho kugira zahabu nyinshi kitwa Wushishi-Lukoto, muri Minna ho mu majyaruguru yo hagati ya Nigeria.
Barafashwe barafungwa mu gihe hagikorwa iperereza ku bikorwa byabo, abagabo n’abasore 37 basangwa bapfiriye muri gereza bivugwa ko bari bacucitse muri kasho.
Inkuru dukesha Africa News ivuga ko raporo y’ibanga yabonwe n’ikinyamakuru cy’abafaransa AFP ivuga ko abo bantu 37 bapfuye bazize ubucucike bw’abantu benshi n’umwuka mubi mu cyumba cya gereza, nubwo urwego rushinzwe umutekano no kurengera abaturage, NSCDC rwo rwatangaje ko ari icyorezo cyabahitanye.
Ubwo Commandant Suberu Aniviye yageragezaga gusobanura iby’urupfu rw'aba bantu rwabaye ku wa 17 Nzeri 2026, yavuze ko aho bari bafungiwe hagaragaye icyo yise "icyorezo" cyaje gitunguranye kandi kikaba cyandura cyane.
Yagize ati:
“Abantu benshi mu bari bafunzwe bakekwaho ibyaha basanzwe bapfuye mu gitondo cyo ku wa Kane, nyuma y’uko hakekwa ko habayeho icyorezo. Abo bantu bose bafashwe mu bikorwa byakozwe ku wa 15 no ku wa 16 Nzeri byo gucukura amabuye y’agaciro mu buryo butemewe n’amategeko. Imirambo yabo yajyanywe gukorerwa isuzuma ry’abaganga kugira ngo hamenyekane neza icyateye urupfu.”
Abaturage barakaye cyane, abacukuzi b'amabuye y'agaciro n'imiryango yabuze ababo babyukiye mu myigaragambyo ku wa Gatanu, tariki 18 Nzeri, bitwaje inkoni, mu imihanda ya Minna baririmba bati “Ubutabera bugomba kubaho!”.
Abigaragambya bamaganye cyane inkuru yavuzwe y’uko bishwe n’icyorezo, berekana ko bazize ubucucike muri gereza bwababujije guhumeka. Abashinzwe umutekano bahosheje iyi myigaragambyo hakoreshejwe ibyuka biryana mu maso, ndetse barasa no mu kirere.
Perezida Bola Ahmed Tinubu wa Nigeria yategetse ko habaho iperereza ryihutirwa kandi ryimbitse, avuga ko guverinoma ye itazihanganira impfu ziterwa n'uburangare bw'abayobozi, ihohoterwa, cyangwa kwirengagiza inshingano zabo. Minisitiri w'Ubutegetsi bw'Igihugu, Olubunmi Tunji-Ojo, yatangije ku mugaragaro komite yigenga y'iperereza igizwe n'abantu 10 harimo impuguke mu by'ubuvuzi, abakora mu iperereza, n’abaharanira uburenganzira bwa muntu, yahawe ibyumweru bibiri kugira ngo irangize raporo yayo.