Ubushakashatsi bwagaragaje indwara eshatu zikwiye kwitabwaho by’umwihariko mu Rwanda
.jpg)
Ubushakashatsi bwashyizwe ahagaragara bwagaragaje indwara eshatu zikwirakwizwa hagati y’inyamaswa n’abantu zigomba kwitabwaho by’umwihariko mu Rwanda.
Ubu bushakashatsi bwashyizwe ahagaragara mu kinyamakuru mpuzamahanga BMJ Public Health, ku wa 6 Ukwakira 2026, bukorwa n’abashakashatsi 18, bwari bugamije gushyira ku murongo indwara zituruka ku nyamaswa zifite ingaruka zikomeye ku buzima bw’abaturage.
Abashakashatsi bagaragaje ko ibisazi by’imbwa, igituntu cyandurira hagati y’abantu n’inyamaswa, na Toxoplasmosis biri mu ndwara zashyizwe imbere mu byiciro byazo. Banagaragaje imbogamizi zirimo kubura amahugurwa ahuza inzego zitandukanye, ubushobozi bw’amafaranga budahagije n’ihuzwa ridakomeye ry’amakuru ajyanye n’ubuzima.
Ubushakashatsi busaba gushimangira uburyo bwo gukurikirana no gutahura indwara hakiri kare, kunoza ihanahana ry’amakuru hagati y’inzego z’ubuzima bw’abantu, amatungo n’ibidukikije, no gushora imari mu guhugura abakozi babifitiye ubumenyi.
Ibyavuye muri ubu bushakashatsi bishobora gufasha u Rwanda gushyira imbere ingamba n’ingengo y’imari bigamije gukumira indwara zituruka ku nyamaswa, bityo bikagabanya ibyago by’ibyorezo n’ingaruka zabyo ku buzima bw’abaturage.