Uganda yashyizeho akato k’iminsi 21 ku baturage bagaruka bavuye muri RDC
Uganda yatangaje ko abaturage bayo bagaruka mu gihugu barakoze ingendo muri Repubulika Iharanira Demokarasi ya Congo bazajya bashyirwa mu kato k’iminsi 21, mu rwego rwo gukumira ikwirakwira ry’icyorezo cya Ebola.
Minisitiri w’Ubuzima wa Uganda, Hon. Dr. Chris Baryomunsi, yavuze ko iki cyemezo cyafashwe mu gihe igihugu gikomeje gukaza ingamba zo gukumira Ebola, nubwo cyatangaje ko cyarangije guhangana n’iki cyorezo cyari cyagaragaye muri Nyakanga 2026.
Impungenge ziyongereye nyuma y’uko abantu babiri banyuze muri Uganda bagaragayeho Ebola muri Kenya na Nigeria. Umurwayi wa mbere wa Ebola muri Kenya yari yaravuye muri RDC, anyura ku Kibuga cy’Indege Mpuzamahanga cya Entebbe mbere yo kugera i Nairobi ku wa 3 Ukwakira, aza gupfa nyuma y’iminsi ibiri.
Muri Nigeria, inzego z’ubuzima zirimo gukora iperereza ku mugore w’umudipolomate w’Ubusuwisi wagaragaweho Ebola nyuma y’urugendo rwanyuze muri Uganda. Icyakora, kugeza ubu nta gihamya yatangajwe yemeza ko izo ndwara zombi zifitanye isano itaziguye.
Minisitiri Dr. Baryomunsi mu kiganiro n’itangazamakuru ryo muri Uganda yavuze ko Uganda yakajije igenzura ry’abagenzi ku Kibuga cy’Indege cya Entebbe no ku mipaka yose yo ku butaka. Yagize ati:
“Minisiteri yakajije igenzura ry’abagenzi ku Kibuga cy’Indege Mpuzamahanga cya Entebbe no ku mipaka yose yo ku butaka. Abagenzi bose bashaka kwinjira muri Uganda banyuze mu kirere, ku butaka cyangwa mu mazi bagomba kuzuza urupapuro rurimo amakuru azafasha kubakurikirana.”
Mu 2026, icyorezo cya Ebola cyo mu bwoko bwa Bundibugyo cyibasiye Repubulika Iharanira Demokarasi ya Congo (RDC), aho kugeza ku wa 20 Ukwakira hamaze kwemezwa abarwayi 9.704 n’impfu 4.687. Nubwo Uganda yatangaje ko icyorezo cyahacitse muri Kanama, Kenya na Nigeria byaje gutangaza abantu banduye iki cyorezo baturutse mu karere, bishimangira akamaro ko gukomeza gukurikirana abagenzi no guhuza ingamba zo kukirwanya hagati y’ibihugu.
Minisitiri w’Ubuzima wa Uganda, Hon. Dr. Chris Baryomunsi, aganira n’itangazamakuru.