Abapolisi 1652 binjiye muri Polisi y’u Rwanda, Minisitiri Biruta abasaba gukumira ibyaha bitaraba

Eric Niyongira na Aimable Dusabimana · 28 Ukwakira 2026

Polisi y’u Rwanda yungutse abapolisi bashya 1.652 basoje amahugurwa y’ibanze y’icyiciro cya 22, mu muhango Minisitiri w’Umutekano mu Gihugu, Dr. Vincent Biruta, yabasabiyemo gushyira imbere gukumira ibyaha aho gutegereza ko biba kugira ngo babikurikirane.

Uyu muhango wabaye kuri uyu wa Gatatu, tariki ya 28 Ukwakira 2026, mu Ishuri ry’Amahugurwa rya Polisi y’u Rwanda (PTS) riherereye i Gishari, mu Karere ka Rwamagana, mu Ntara y’Iburasirazuba.

Witabiriwe n’abayobozi batandukanye barimo Umuyobozi Mukuru wa Polisi y’u Rwanda, IGP Felix Namuhoranye, Guverineri w’Intara y’Iburasirazuba, Pudence Rubingisa, n’abandi bayobozi mu nzego z’umutekano n’iz’ubuyobozi bwa Leta.

Mu ijambo rye, Minisitiri Biruta yashimangiye ko Polisi y’u Rwanda ikwiye kurangwa n’imikorere igamije gutahura hakiri kare ibibazo bishobora guhungabanya umutekano no kubikumira bitaraba.

Yagize ati:

“Turifuza Polisi itekereza mbere y’igihe ibibazo bishobora kuvuka aho gutegereza ko biba; Polisi ikumira ibyaha aho gutegereza kubikurikirana bimaze gukorwa.”

Yasabye abapolisi bashya kurangwa n’ikinyabupfura, ubunyamwuga n’ubwitange mu nshingano zabo, bagashyira imbere abaturage n’ibibazo byabo.

Yanabibukije akamaro ko gukorana bya hafi n’izindi nzego z’umutekano mu kurinda imibereho myiza y’Abanyarwanda no gusigasira ishema ry’igihugu.

Umuyobozi w’Ishuri ry’Amahugurwa rya Polisi rya Gishari, CP Rafiki Mujiji, yashimiye abapolisi basoje amahugurwa ku murava, ikinyabupfura n’ubwitange bagaragaje mu gihe cyose bamaze biga.

Yabibukije ko gusoza amahugurwa y’ibanze bitavuze ko barangije kwiga, ahubwo ari intangiriro y’urugendo rwabo mu mwuga wa Polisi, kuko bazakomeza guhabwa andi mahugurwa agamije kongera ubumenyi n’ubushobozi bwo kuzuza neza inshingano zabo.

CP Mujiji yabasabye kandi gukomeza kurangwa n’ubunyangamugayo, kwirinda imyitwarire yose ishobora guhesha isura mbi Polisi y’u Rwanda no gusigasira indangagaciro zayo aho bazoherezwa gukorera hose.

Mu byaranze uyu muhango harimo imyiyereko itandukanye yakozwe n’abapolisi basoje amahugurwa, bagaragaza bumwe mu bumenyi n’ubushobozi bungukiye mu ishuri.

Iyo myiyereko yarimo guhosha imyigaragambyo, kumasha, imyitozo yo kwirwanaho n’akarasisi.

Ishuri ry’Amahugurwa rya Polisi rya Gishari ryashinzwe mu 2000. Ritanga amahugurwa y’ibanze ku binjira mu mwuga wa Polisi, amahugurwa ya ba ofisiye n’andi yihariye agamije kongerera abapolisi ubumenyi n’ubushobozi mu nshingano zabo.

Minisitiri w’Umutekano w’Imbere mu Gihugu, Dr. Vincent Biruta, ni we wayoboye umuhango wo gusoza amahugurwa y’icyiciro cya 22 y’Abapolisi bato

Akarasisi k’abapolisi bato basoje amahugurwa y’icyiciro cya 22, i Gishari mu Karere ka Rwamagana

Bamwe mu bapolisi bashya basoje amahugurwa y’ibanze y’icyiciro cya 22

Umuyobozi w’Ishuri rya Polisi rya Gishari, CP R. Mujiji, yashimiye abasoje amahugurwa ku ishyaka, ikinyabupfura n’ubwitange bagaragaje

Abapolisi basoje amahugurwa mu myiyereko y’imyitozo njyarugamba

Imyiyereko yo guhosha imyigaragambyo

Imyiyereko yo kumasha

Abapolisi bashya mu karasisi, mu muhango wo gusoza amahugurwa yabo

Umuhango wabereye ku kibuga cy’Ishuri ry’Amahugurwa rya Polisi rya Gishari

Ishuri ry’amahugurwa rya Polisi riherereye i Gishari mu Karere ka Rwamagana