Abofisiye 76 basoje amahugurwa yo kuyobora ingabo, Maj. Gen. Nyakarundi abaha umukoro
Abofisiye 76 bo mu Ngabo z’u Rwanda (RDF), Polisi y’u Rwanda (RNP) n’Urwego rw’Igihugu rushinzwe Igorora (RCS), basoje amahugurwa y’ibyumweru 22 agamije kubongerera ubushobozi bwo kuyobora ingabo, gutegura ibikorwa bya gisirikare no gufata ibyemezo mu nshingano zabo.
Umuhango wo gusoza aya mahugurwa wabaye kuri uyu wa Gatanu, tariki ya 30 Ukwakira 2026, mu Ishuri Rikuru rya Gisirikare rya Nyakinama, mu Karere ka Musanze, uyoborwa n’Umugaba w’Ingabo z’u Rwanda zirwanira ku Butaka, Maj Gen Vincent Nyakarundi.
Mu basoje aya mahugurwa y’icyiciro cya 27 cya Junior Command and Staff Course (JCSC), harimo abofisiye 71 ba RDF, babiri ba Polisi y’u Rwanda n’abandi batatu b’Urwego rw’Igihugu rushinzwe Igorora.
Aya mahugurwa yibanze ku miyoborere ya gisirikare, igenamigambi ry’ibikorwa, gufata ibyemezo no guhuza ibikorwa by’ingabo ku rwego rwa Batayo na Burigade.
Maj Gen Nyakarundi yashimiye abofisiye basoje aya mahugurwa, abibutsa ko kurangiza amasomo atari iherezo ry’urugendo rwo kwiyungura ubumenyi, ahubwo ari intangiriro y’ikindi cyiciro mu iterambere ryabo ry’umwuga.
Yabagaragarije ko ubumenyi, ubushobozi n’ubunararibonye bungukiye muri aya mahugurwa bizababera umusingi mu nshingano bazakomeza gukora, ariko ko intsinzi yabo izapimirwa ku buryo bazabishyira mu bikorwa, bagafata ibyemezo bikwiye kandi bagakomeza kubahiriza indangagaciro z’umwuga wabo.
Yagize ati:
“Ubumenyi, ubushobozi n’ubunararibonye mwungukiye muri aya mahugurwa bizababera urufatiro rukomeye mu gihe musubira mu mirimo yanyu aho mukorera, mukajya gushyira mu bikorwa inshingano ziri imbere. Icyakora, intsinzi yanyu izashingira cyane ku buryo muzashyira mu bikorwa ubwo bumenyi, mufata ibyemezo bikwiye, mukubahiriza inshingano zanyu kandi mukaguma ku ndangagaciro z’umwuga wanyu.”
Yabasabye kandi gukomeza kwihugura, kugira ubushobozi bwo guhangana n’ibibazo bishya by’umutekano no kujyana n’iterambere ry’ikoranabuhanga rigenda rihindura imikorere mu bya gisirikare.
Muri uyu muhango, Maj James Rwamuhizi yashimiwe kuba yaritwaye neza kurusha abandi bose basoje aya mahugurwa, ahabwa igihembo cy’umunyeshuri wabaye uwa mbere.
Maj Gen Nyakarundi yashimiye abofisiye basoje aya mahugurwa, abibutsa ko kurangiza amasomo atari iherezo ry’urugendo rwo kwiyungura ubumenyi
Amahugurwa basoje yari agizwe n’amasomo y’inyigisho, ibiganiro n’imyitozo ngiro, bigamije guteza imbere ubushobozi bwo gusesengura ibibazo, gufata ibyemezo no kuyobora ibikorwa bya gisirikare mu buryo bunoze.
Ni amahugurwa agamije gutegura abofisiye ku nshingano zo kuyobora no gufasha abayobozi mu nzego zitandukanye za gisirikare, ari na ko abaha umusingi wo gukomeza andi masomo yo ku rwego rwo hejuru.