Gen Muhoozi yatangaje ko Uganda yatangiye gukura ingabo zayo muri Somalia nyuma y’imyaka 20
Umugaba Mukuru w’Ingabo za Uganda, Gen Muhoozi Kainerugaba, yatangaje ko igihugu cye cyatangiye gukura ingabo zacyo muri Somalia, nyuma y’imyaka igera kuri 20 zifatanya n’izindi ngabo mu bikorwa byo kugarura amahoro n’umutekano muri icyo gihugu.
Mu butumwa yashyize ku rubuga rwa X ku wa Kane, tariki ya 29 Ukwakira 2026, Gen Muhoozi yavuze ko Uganda yatangiye guhererekanya inshingano zo kubungabunga umutekano n’ingabo za Somalia.
Yagize ati: “Nk’uko twabisezeranyije, twatangiye gukura ingabo za Uganda muri Somalia. Nyuma y’imyaka 20 yaranzwe n’amaraso menshi n’ubwitange, turimo guhererekanya inshingano z’umutekano n’abavandimwe bacu bo muri Somalia.”
Icyakora, Muhoozi ntiyatangaje umubare w’abasirikare bamaze kuvanwa muri Somalia, uduce bavanywemo cyangwa igihe ibikorwa byo kubakurayo bizasozwa.
Ntiyanasobanuye niba iki cyemezo kireba ingabo za Uganda ziri mu butumwa bw’Umuryango wa Afurika Yunze Ubumwe bwo gushyigikira umutekano muri Somalia (AUSSOM), iziri mu bufatanye bwihariye hagati y’ibihugu byombi, cyangwa zose.
Uganda ni cyo gihugu cya mbere cyohereje ingabo muri Somalia mu butumwa bwa AMISOM, muri Werurwe 2007, kandi cyakomeje kugira umubare munini w’abasirikare muri ubwo butumwa.
AMISOM yasimbuwe na ATMIS mu 2022, na yo iza gusimburwa na AUSSOM mu ntangiriro za 2025.
Umuryango wa Afurika Yunze Ubumwe wari wemereye Uganda kugira abasirikare 4.500 muri AUSSOM, ubutumwa bufite gahunda yo kugenda bugabanya ingabo mu byiciro, kugeza zihavuye zose mu Ukuboza 2029, bitewe n’uko umutekano uzaba uhagaze.
Amakuru yatangajwe na Geeska avuga ko Uganda yari yaramenyesheje Somalia ko izava mu duce dutandukanye two muri Lower Shabelle, turimo Barawe, Bulo Marer, Qoryoley na Janaale.
Itangazo rya Muhoozi rije nyuma y’uko Perezida Yoweri Museveni yakiriye Perezida wa Somalia, Hassan Sheikh Mohamud, mu ngoro y’Umukuru w’Igihugu i Entebbe, ku wa Mbere, tariki ya 26 Ukwakira 2026.
Ibiro bya Perezida wa Uganda byatangaje ko Mohamud yashimiye Uganda uruhare rw’ingabo zayo mu kugarura umutekano muri Somalia, agaragaza icyifuzo cy’uko zakomeza kuhaguma igihe kirekire kugira ngo ibikorwa byo kugarura amahoro bigere ku ntego.
Mu kiganiro cyabo, Museveni yashimangiye akamaro ko guhuriza hamwe imbaraga mu guhangana n’ibibazo by’umutekano.
Perezida Yoweri Museveni wa Uganda na Perezida Hassan Sheikh Mohamud wa Somalia bahagaze ku ngazi z’ingoro y’Umukuru w’Igihugu i Entebbe, ku wa Mbere, tariki ya 26 Ukwakira 2026.
Muri Nyakanga 2026, Leta Zunze Ubumwe za Amerika zari zaramenyesheje Umuryango wa Afurika Yunze Ubumwe ko zitazashyigikira ivugururwa ry'ubutumwa bwa AUSSOM mu Ukuboza, mu gihe inkunga y'Ibiro bya Loni bishinzwe gushyigikira ibikorwa muri Somalia (UNSOS) yagabanyijweho 25%.
Muri Kanama 2026, Gen Muhoozi yari yatangaje ko Uganda iteganya kuba yakuye ingabo zayo zose muri Somalia bitarenze ku wa Cyumweru, tariki ya 1 Kanama 2027.
Nubwo Uganda yatangaje ko yatangiye kuzikurayo, umutwe wa Al-Shabaab uracyakorera mu bice bimwe byo mu majyepfo no hagati muri Somalia, aho ikibazo cy’umutekano kigikomeje.
Abasirikare ba Uganda bari mu butumwa bwa AMISOM bakora irondo bambuka ikiraro mu gace ka Qoryooley, muri Lower Shabelle, ku wa Kabiri, tariki ya 29 Mata 2014.
Perezida Yoweri Museveni na Hassan Sheikh Mohamud bagirana ibiganiro bicaye, inyuma yabo hari amabendera ya Uganda na Somalia.
Abasirikare ba Uganda bo mu itsinda rya 48 bahagaze ku murongo mu kigo cya gisirikare cya Singo, imbere yabo hari umuyobozi ufite ibendera rya Uganda.
Umuyobozi mukuru mu ngabo za Uganda ageza ijambo ku basirikare bo mu itsinda rya 48, ahagaze imbere y’aho avugira.