I Kigali hateraniye inama igamije guteza imbere uburinganire muri Polisi zo muri Afurika y’Iburasirazuba
Abayobozi n’abahagarariye Polisi zo mu bihugu bitanu byo muri Afurika y’Iburasirazuba bateraniye i Kigali mu nama igamije gushakira ibisubizo imbogamizi abagore bahura na zo mu nzego z’umutekano, zirimo izibabangamira mu kwinjira muri uwo mwuga, kuwugumamo no kuzamurwa mu ntera mu myanya y’ubuyobozi.
Iyi nama y’iminsi ine yatangiye ku wa Mbere, tariki ya 21 Nzeri 2026, ku Cyicaro Gikuru cya Polisi y’u Rwanda ku Kacyiru, yitabirwa n’abahagarariye Polisi zo mu Rwanda, Kenya, Tanzania, Djibouti na Seychelles, hamwe n’abahagarariye Umuryango uhuza Abayobozi Bakuru ba Polisi mu Karere ka Afurika y’Iburasirazuba (EAPCCO) n’Ishami ry’Umuryango w’Abibumbye rishinzwe kurwanya Ibiyobyabwenge n’Ibyaha (UNODC).
Iyi nama iri mu cyiciro cya kabiri cy’umushinga Empowering Every Badge, ugamije guteza imbere uburinganire no kongera uruhare rw’abagore mu nzego zishinzwe kugenzura iyubahirizwa ry'amategeko. Biteganyijwe ko ibihugu byitabiriye inama bizasuzuma ibyavuye mu bushakashatsi bwakozwe mu cyiciro cya mbere, buri kimwe kikagaragaza ibikorwa byihutirwa byagifasha gukemura imbogamizi zagaragajwe.
Umuyobozi Mukuru Wungirije wa Polisi y’u Rwanda ushinzwe Ubutegetsi n’Abakozi, DCG Jeanne Chantal Ujeneza, wafunguye iyi nama ahagarariye Umuyobozi Mukuru wa Polisi y’u Rwanda akaba na Perezida w’Umuryango w’Ubufatanye uhuza Abayobozi Bakuru ba Polisi mu Karere ka Afurika y’Iburasirazuba, EAPCCO, yavuze ko ari umwanya wo guhindura ibyavuye mu bushakashatsi ibikorwa bifatika.
Ati:
“Twishimiye cyane kuba i Kigali ari ho hatoranyijwe kwakira iyi nama y'ingenzi, igaragaza intambwe yo kuva ku gutegura no kureba ibyavuye mu bushakashatsi, tukajya mu cyiciro cyishyirwa mu bikorwa rya gahunda yo gushyigikira intambwe yatewe mu buringanire, icyiciro cya kabiri.”
DCG Ujeneza yasobanuye ko icyiciro cya mbere cy’uyu mushinga cyagaragaje imbogamizi abagore bahura na zo mu kwinjira mu nzego z’umutekano, gukomeza kuzikoramo no gutera imbere mu mwuga, harimo no kugera mu myanya y’ubuyobozi bukuru.
Yavuze ko abayobozi ba Polisi bagomba kugira uruhare mu kugena ibyihutirwa, mu gihe komite zishinzwe uburinganire zizafasha gushyira mu bikorwa ingamba zizemezwa, hagamijwe ko ibyavuye mu bushakashatsi bitagarukira mu nyandiko gusa.
Umuyobozi Mukuru Wungirije wa Polisi y’u Rwanda ushinzwe Ubutegetsi n’Abakozi, DCG Jeanne Chantal Ujeneza, wafunguye iyi nama ahagarariye Umuyobozi Mukuru wa Polisi y’u Rwanda
Umuyobozi Mukuru w’Ubunyamabanga bwa EAPCCO, akaba n’Umuyobozi w’Ibiro bya Interpol mu Karere ka Afurika y’Iburasirazuba, Apollo S. Africa, yavuze ko abayobozi ba Polisi bakiriye neza ibyavuye mu cyiciro cya mbere cy’uyu mushinga.
Yagaragaje ko icyiciro cya kabiri kizibanda ku gukorera hamwe mu gukemura ibibazo byagaragajwe, buri gihugu kigena ibikorwa bihuye n’amategeko n’imikorere yacyo.
Umuyobozi Mukuru w’Ubunyamabanga bwa EAPCCO, akaba n’Umuyobozi w’Ibiro bya Interpol mu Karere ka Afurika y’Iburasirazuba, Apollo S. Africa
Ku rundi ruhande, impuguke ya UNODC muri uyu mushinga, Tina Mykkanen, yavuze ko kongera umubare w’abagore muri Polisi bidahagije, ahubwo ko hakenewe no kwita ku bibafasha gukomeza gukora uwo mwuga, gutera imbere no kugera mu nzego zifata ibyemezo.
Yashimangiye ko rimwe mu masomo yavuye mu cyiciro cya mbere ari uko kugira umubare w’abagore uhagije byonyine bidahagije, kuko hakenewe n’ingamba zituma uruhare rwabo mu nzego z’umutekano rurushaho kugira umusaruro.
Iyi nama igabanyijemo ibice bibiri by’iminsi ibiri. Mu gice cya mbere, abahagarariye abayobozi bakuru ba Polisi bagena icyerekezo n’ibikorwa byihutirwa, mu gihe icya kabiri kigenewe Komite ishinzwe Uburinganire muri EAPCCO, izasuzuma uburyo ibyo bikorwa byashyirwa mu bikorwa.
Biteganyijwe ko hanaganirwa ku buryo bwo gukurikirana intambwe izaterwa na buri gihugu, gushyiraho uburyo bwo kubazwa inshingano no gushyiraho imirongo ifasha abagore bakora muri Polisi kungurana ubumenyi no gushyigikirana mu mwuga.
Umushinga Empowering Every Badge ushyirwa mu bikorwa na EAPCCO, UNODC n’abandi bafatanyabikorwa, ku nkunga ya Guverinoma y’u Budage, ugamije guteza imbere uburinganire n’ubuyobozi bw’abagore mu nzego zishinzwe kubahiriza amategeko mu Karere ka Afurika y’Iburasirazuba.
Polisi y’u Rwanda yatangaje ko izakomeza gushyigikira icyiciro cya kabiri cy’uyu mushinga, aho Ikigo cyayo cy’Indashyikirwa mu Karere mu gutanga ubumenyi ku buringanire no kurwanya ihohoterwa rishingiye ku gitsina cyiteguye kwakira amahugurwa no gufasha mu kungurana ubumenyi hagati y’ibihugu.
Impuguke ya UNODC muri uyu mushinga, Tina Mykkanen, yavuze ko kongera umubare w’abagore muri Polisi bidahagije, ahubwo ko hakenewe no kwita ku bibafasha gukomeza gukora uwo mwuga, gutera imbere no kugera mu nzego zifata ibyemezo.
Iyi nama y’iminsi ine yatangiye ku wa Mbere, tariki ya 21 Nzeri 2026, ku Cyicaro Gikuru cya Polisi y’u Rwanda ku Kacyiru
I Kigali hateraniye inama igamije guteza imbere uburinganire muri Polisi zo muri Afurika y’Iburasirazuba