Imvururu zikomeye mu Bufaransa: Inyubako zatwitswe, abantu 1200 batabwa muri yombi
Abantu nibura 1200 batawe muri yombi mu myigaragambyo yahungabanyije imijyi itandukanye yo mu Bufaransa, aho inyubako zatwitswe, amaduka agasahurwa ndetse abapolisi barenga 150 bagakomereka. Abigaragambya barasaba Leta gukemura ibibazo biri mu burezi no guhangana n’izamuka ry’ibiciro by’imibereho.
Imyigaragambyo yahuje ibihumbi amagana by’abaturage mu Bufaransa ku wa Gatandatu, tariki ya 17 Ukwakira 2026, yahindutse imvururu zikomeye mu mijyi itandukanye, aho abantu nibura 1.200 batawe muri yombi, inyubako zigatwikwa ndetse amaduka agasahurwa.
Iyi myigaragambyo yatangijwe n’abanyeshuri batishimiye imiterere y’uburezi, iza kwaguka yitabirwa n’abaturage binubira izamuka ry’ibiciro by’ibikomoka kuri peteroli, imibereho ihenze n’ibibazo biri mu mitangire ya serivisi rusange.
Minisitiri w’Umutekano w’Imbere mu Gihugu, Laurent Nuñez, yatangaje ko abantu bagera ku 550.000 bitabiriye imyigaragambyo hirya no hino mu gihugu, mu gihe ihuriro ry’abakozi rya CGT ryavuze ko abigaragambije bageze ku 800.000.
Minisitiri w’Intebe w’u Bufaransa, Sébastien Lecornu, yatangaje ko abantu nibura 1.200 batawe muri yombi, mu gihe abapolisi n’abandi bashinzwe umutekano barenga 150 bakomerekeye muri izo mvururu.
Inyubako zatwitswe, amaduka arasahurwa
Mu murwa mukuru Paris, abigaragambya bahanganye n’abapolisi, bakoresha imyotsi iryana mu maso n’imodoka zitera amazi kugira ngo batatanye imbaga.
Mu gace ka Place de la République, hagaragaye imodoka n’ibindi bikoresho byatwitswe, mu gihe amaduka atandukanye yasahuwe.
Mu mujyi wa Limoges, inyubako y’ubuyobozi bw’umujyi yafashwe n’inkongi y’umuriro yangije igice kinini cyayo, harimo n’igisenge cyasenyutse.
Mu mujyi wa Lyon, ibiro bishinzwe ubukerarugendo byatwitswe, naho muri Marseille, bamwe mu bigaragambya binjira mu nyubako y’ubuyobozi bw’umujyi, bangiza bimwe mu biyigize.
Nubwo ibikorwa by’urugomo byagaragaye mu mijyi myinshi, amakuru yatangajwe na BBC na Reuters agaragaza ko igice kinini cy’abaturage cyigaragambije mu mahoro.
Mu mujyi wa Saint-Étienne, umwe mu bigaragambya yatakaje ikiganza mu gihe cy’imvururu. Polisi yatangaje ko hagikorwa iperereza ku cyateye iyo mvune, mu gihe hakomeje kwibazwa ku buryo inzego z’umutekano zikoresha imbaraga mu guhosha imyigaragambyo.
Perezida Macron yihanangirije abateza imvururu
Perezida w’u Bufaransa, Emmanuel Macron, yamaganye ibikorwa by’urugomo, avuga ko abakoze ubusahuzi, bagatwika inyubako cyangwa bakangiza imitungo bazakurikiranwa n’ubutabera.
Yagize ati: “Abangije ibintu, abagabye ibitero ku nyubako z’ubuyobozi no ku bigo by’ubucuruzi, ndetse bagasahura n’inyubako z’ubuyobozi bw’imijyi, bazakurikiranwa kandi bahanwe.”
Minisitiri w’Intebe Lecornu na we yashimangiye ko imyigaragambyo mu mahoro ari uburenganzira bw’abaturage, ariko ko nta wemerewe gukoresha urugomo kugira ngo agere ku nyungu za politiki.
Iyi myigaragambyo ibaye mu gihe u Bufaransa bwitegura amatora ya Perezida ateganyijwe mu 2027, aho amashyaka atavuga rumwe n’ubutegetsi ashinja Leta kunanirwa gukemura ibibazo by’imibereho y’abaturage.
Umunyapolitiki Jean-Luc Mélenchon yanenze uburyo polisi yitwaye mu guhangana n’abigaragambya, mu gihe Marine Le Pen we yavuze ko ibyifuzo by’abaturage bifite ishingiro, ariko ko byayobejwe n’abanyapolitiki bo mu ruhande rw’ibumoso bukabije.
Guverinoma yari yarasezeranyije kongera abarimu 3.000 basimbura abandi mu mashuri, ariko icyo cyemezo nticyahagaritse imyigaragambyo.
Izi mvururu zije nyuma y’ibyumweru by’imyigaragambyo y’abanyeshuri, yaje kwaguka ihuza amashyirahamwe y’abakozi n’abandi baturage binubira uko ubukungu n’imibereho bihagaze mu Bufaransa.