Ingabo na Polisi by’u Rwanda bakoranye umuganda n’abaturage ba Mozambique
Inzego z’umutekano z’u Rwanda ziri mu butumwa bwo kugarura amahoro n’umutekano muri Mozambique, zifatanyije n’abaturage bo mu Karere ka Palma mu muganda rusange, zinashyikiriza abanyeshuri ibitabo n’ibikoresho bya siporo mu rwego rwo kubafasha mu myigire yabo.
Iki gikorwa cyabaye ku wa Kabiri, tariki ya 22 Nzeri 2026, mu Ntara ya Cabo Delgado, ahari ingabo n’abapolisi b’u Rwanda bari mu butumwa bwo gufasha Mozambique guhangana n’ibibazo by’umutekano. Cyateguwe n’ubuyobozi bw’Akarere ka Palma mu rwego rwo kwizihiza Umunsi Mpuzamahanga w’Isuku, kigamije guteza imbere isuku no gushimangira ubufatanye hagati y’abaturage n’inzego z’umutekano.
Umuganda wabereye ku Ishuri ryisumbuye rya Palma, witabirwa n’abaturage, abayobozi b’inzego z’ibanze, abahagarariye inzego zitandukanye ndetse n’abashinzwe umutekano. Abawitabiriye bakoze ibikorwa by’isuku mu rwego rwo kwimakaza umuco wo kugira isuku no kurwanya indwara ziterwa n’umwanda.
Muri iki gikorwa, inzego z’umutekano z’u Rwanda zashyikirije iri shuri inkunga igizwe n’ibitabo byifashishwa mu kwigisha n’ibikoresho bya siporo, bigamije gufasha abanyeshuri kongera ubumenyi no kurushaho kwitabira ibikorwa by’imikino.
Umuyobozi w’Akarere ka Palma, João Agostinho Buchili, yashimiye abitabiriye uyu muganda, ashimangira akamaro ko kwimakaza isuku mu mibereho yabo mu kurinda abaturage indwara.
Yashimiye kandi inzego z’umutekano z’u Rwanda ku nkunga zikomeje gutera abaturage bo muri aka karere, anagaragaza uruhare rwazo mu bikorwa bigamije kugarura amahoro n’umutekano muri Cabo Delgado.
Iki gikorwa kibaye mu gihe inzego z’umutekano z’u Rwanda zikomeje gufatanya n’iza Mozambique mu bikorwa byo kugarura umutekano no gufasha abaturage bongeye gusubira mu buzima busanzwe nyuma y’ibibazo by’umutekano byatewe n’ibitero by’imitwe yitwaje intwaro muri icyo gihugu.
Muri Nyakanga 2021 ni bwo u Rwanda rwatangiye kohereza ingabo n’abapolisi muri Cabo Delgado, rubisabwe na Guverinoma ya Mozambique, mu rwego rwo gufatanya n’inzego z’umutekano z’icyo gihugu kurwanya imitwe yitwaje intwaro no kugarura umutekano.
Kuva icyo gihe, inzego z’umutekano z’u Rwanda zagiye zikora n’ibikorwa bigamije gufasha abaturage, birimo gutanga serivisi z’ubuvuzi, ibikoresho by’ishuri n’imbuto zo guhinga, mu rwego rwo kubafasha kuzahura imibereho yabo.
Ingabo na Polisi by’u Rwanda bakoranye umuganda n’abaturage ba Mozambique
Bashyikirije abanyeshuri ibitabo n’ibikoresho bya siporo mu rwego rwo kubafasha mu myigire yabo