U Rwanda mu nama yiga ku ruhare rw’ingabo mu kubungabunga amahoro, ubutabazi no kurwanya ibiza
Abagaba bakuru b’ingabo bo mu bihugu 18 bya Afurika bahuriye i Kampala muri Uganda, mu nama igaruka ku buryo ingabo zitagenerwa ibikorwa by’intambara gusa, ahubwo zigira n’uruhare mu kubungabunga amahoro, ubutabazi no guhangana n’ibiza.
Kuva ku wa 5 kugeza ku wa 8 Ukwakira 2026, i Kampala muri Uganda hari kubera inama ya mbere ihuza abagaba bakuru b’ingabo bo muri Afurika ku bikorwa bya gisirikare bitari iby’intambara.
Iyi nama izwi nka Conference of African Defence Chiefs on Military Operations Other Than War (MOOTW), iri kubera muri Speke Resort Munyonyo mu Mujyi wa Kampala.
U Rwanda ni kimwe mu bihugu 18 bya Afurika byitabiriye iyi nama, igamije kungurana ibitekerezo ku bikorwa ingabo zikora bitari intambara.
Abitabiriye baraganira ku nshingano zitandukanye z’ingabo zirimo ibikorwa byo kubungabunga amahoro, ubutabazi, guhangana n’ibiza ndetse n’ibindi bikorwa bigamije kurinda umutekano no gufasha abaturage.
Uruhare rw’ingabo rurenga urugamba
Mu bihe bitandukanye, ingabo ntizitabazwa gusa igihe hari intambara. Zigira uruhare mu bikorwa by’ubutabazi, gutabara abaturage mu gihe cy’ibiza, kubungabunga amahoro ndetse no gufasha inzego za Leta mu guhangana n’ibibazo bishobora guhungabanya imibereho y’abaturage.
Iyi nama itanga umwanya ku bagaba bakuru b’ingabo wo gusangira ubunararibonye no kurebera hamwe uburyo ibihugu bya Afurika byarushaho gukorana muri ibyo bikorwa bya gisirikare bitari iby’intambara.
Inama ya MOOTW ije mu gihe ibihugu bya Afurika bikomeje guhangana n’ibibazo bitandukanye by’umutekano n’ibiza, bisaba ko ingabo zigira uruhare rurenze ibikorwa byo ku rugamba.
Ibiganiro bizakomeza kugeza ku wa 8 Ukwakira 2026, aho biteganyijwe ko abitabiriye bazasangira ubunararibonye no kurebera hamwe uburyo ibikorwa nk’ibi byarushaho kunozwa ku mugabane wa Afurika.
Iyi nama ihuza abagaba bakuru b’ingabo bo muri Afurika ku bikorwa bya gisirikare bitari iby’intambara
Iyi nama yabereye i Kampala muri Uganda