Ukraine: Abantu 14 bishwe mu gitero cy’indege itagira umupilote kuri sitasiyo ya gari ya moshi
Abantu nibura 14 bishwe, abandi 14 barakomereka nyuma y’uko indege y’intambara itagira umupilote y’u Burusiya igabye igitero kuri sitasiyo nkuru ya gari ya moshi mu Mujyi wa Dnipro, hagati muri Ukraine, mu gihe abagenzi bari bategereje gari ya moshi.
Iki gitero cyabaye ku wa Kane, tariki ya 29 Ukwakira 2026, ubwo indege itagira umupilote yakoreshaga moteri yihuta cyane yagwaga ahategerezwa gari ya moshi, aho hari hahagaze izitwara abagenzi.
Mu zari zihahagaze harimo gari ya moshi ya 866 ikora urugendo ruva Dnipro rwerekeza Zaporizhzhia.
Perezida wa Ukraine, Volodymyr Zelensky, yamaganye iki gitero, avuga ko cyagabwe ahari abagenzi bari bategereje gari ya moshi.
Yagize ati: “Ni igitero giteye ubwoba cy’u Burusiya kuri sitasiyo ya gari ya moshi ya Dnipro. Abarusiya bagabye igitero bakoresheje indege itagira umupilote, bibasira ahategerezwa gari ya moshi, hari hahagaze gari ya moshi isanzwe ikora ingendo ngufi n’indi itwara abagenzi.”
Ubuyobozi bw’Ingabo mu Karere ka Dnipropetrovsk bwatangaje ko umubare w’abahitanywe n’iki gitero wageze kuri 14, mu gihe abandi 14 bakomeretse.
Mu bakomeretse, 13 bari mu bitaro, barimo batandatu barembye. Muri abo barembye harimo umwana w’umuhungu w’imyaka 11, mu gihe umugabo w’imyaka 40 yatakaje amaguru yombi.
Sosiyete ya Leta ya Ukraine ishinzwe gutwara abantu n’ibintu muri gari ya moshi, Ukrzaliznytsia, yatangaje ko nubwo hari hatanzwe umuburo w’uko umutekano wari ugeramiwe, abantu benshi bari bakiri aho bategereza gari ya moshi.
Yagize iti: “Nubwo hari hatanzwe umuburo w’uko ibyago byariyongereye, abantu bari bakiri ahategerezwa gari ya moshi. Hari abapfuye n’abakomeretse.”
Amafoto yashyizwe ahagaragara agaragaza ibice bya gari ya moshi byangiritse, birimo ibirahure byamenaguritse, ndetse n’imbere mu modoka zitwara abagenzi hangijwe n’igitero.
Ubuyobozi bw’Akarere ka Dnipropetrovsk bwatangaje ko ku wa Gatanu, tariki ya 30 Ukwakira 2026, hazaba umunsi w’icyunamo cyo kwibuka abahitanywe n’iki gitero.
Perezida Zelensky yasabye Umuryango w’Ubumwe bw’u Burayi, Leta Zunze Ubumwe za Amerika n’ibihugu bihuriye muri G7 gufatira u Burusiya ibindi bihano bikomeye.
Imbere muri gari ya moshi yangijwe n’igitero, ahagaragara intebe zitariho abantu n’ibirahure byamenaguritse byanyanyagiye.
Ingabo z’u Burusiya ntizari zagize icyo zitangaza kuri iki gitero. Ubusanzwe, Moscou ihakana kwibasira abasivili ku bushake, ikavuga ko ibitero igaba ku bikorwa remezo bya gari ya moshi biba bigamije inzira zikoreshwa mu gutwara ibikoresho bya gisirikare.
Iki gitero cyabaye mu gihe ibindi bitero byari byagabwe mu bice bitandukanye bya Ukraine.
Mu Karere ka Chernihiv, abakobwa babiri b’imyaka 15 bishwe n’igisasu cya misile, naho mu Mujyi wa Kremenchuk abantu batatu bapfa, abandi 28 barakomereka mu gitero cy’indege zitagira abapilote.
Igice cya gari ya moshi itwara abagenzi, gifite ibirahure byamenaguritse n’imyenge yatewe n’ibisigazwa by’ibisasu.
Abayobozi n’abapolisi kuri sitasiyo ya gari ya moshi ya Dnipro nyuma y’igitero cyagabwe ku wa Kane, tariki ya 29 Ukwakira 2026.
Inyubako ya sitasiyo nkuru ya gari ya moshi mu Mujyi wa Dnipro, muri Ukraine, yafotowe ku wa Gatandatu, tariki ya 29 Kanama 2020.
Ahategerezwa gari ya moshi kuri sitasiyo ya gari ya moshi ya Dnipro, ahafatiwe ifoto ku wa Gatanu, tariki ya 14 Gicurasi 2021.